REJİSSOR AMİL ƏLİ: ““4 TƏKƏR” FİLMİ DÖRD MARAQLI PERSONAJ ÜZƏRİNDƏ QURULUB”
NOFƏL ŞAHLAROĞLU: “BU TİPLİ FİLMLƏR ÇƏKİLMƏLİDİR Kİ, SƏHVLƏRİMİZİ GÖRƏ BİLƏK”
Quruluşçu rejissor Amil Əlinin macəra komediyası janrında çəkdiyi “4 təkər” filminin 3 aprel 2025-ci il tarixindən etibarən bütün kinoteatrlarda nümayişinə başlanılıb. Xronometrajı 1 saat 40 dəqiqə olan filmin mövzusuna əsasən Xəqani sevdiyi qızın ailəsinə məxsus klassik avtomobili qumarda uduzur. Lakin bu maşının Səlim üçün ayrı dəyərləri var. Elə buna görə də atasının Xəqanidən xoşlanmadığını bilən Nüşabə maşını özü təmir etdirsə də, onların arasında xoş münasibət yaratmaq məqsədilə atasına onu məhz Xəqaninin adı ilə sürpriz etmək istəyir. Lakin Xəqani maşını qumarda uduzaraq bu ümidi puç edir. Onun dostları avtomobili geri qaytarmaq üçün Xəqaniyə kömək etmək istəyirlər. Amma onların da bu niyyətini gerçəkləşdirmək heç də asan başa gəlmir. Çünki qarşılarında qəddar və hiyləgər, qumarxana sahibi Şahmar var…
Kinoinfo.az-ın əməkdaşı “4 Təkər”in ilk nümayiş günündə fürsəti fövtə vermədən ilk dəfə çəkdiyi komediya filminin həyəcanını yaşayan rejissor Amil Əli və filmin əsas rollarından birinin ifaçısı Nofəl Şahlaroğlu ilə söhbətləşib.
“Filminizin çox qəribə adı – “4 Təkər”-in arxasındakı xüsusi məna yükünü bilmək istərdik” sualımıza cavab olaraq Amil Əli söylədi ki, ““4 Təkər” filmi dörd maraqlı personaj üzərində qurulmuş bir ssenaridir. Hər obrazınsa öz xarakteri var. Amma adından da bəlli olduğu kimi “4 Təkər”i düşdüyü vəziyyətdən asılı olaraq bu adla ekranlaşdırmışıq”.
Tamaşaçılardan gözləntiləri barədə də danışan rejissor filmin bəyəniləcəyinə əmin olduğunu dedi. O, fikrini “4 Təkər”in tamaşaçıların indiyədək izlədikləri komediya filmlərinin sırasında birinci yerdə olacağı ilə əsaslandırdı. Onu da söylədi ki, filmdə iştirak edən aktyor truppasının işi qaneedici olub: “Aktyorların işindən çox razı qaldım. Həqiqətən qış mövsümündə film çəkmək çox çətin olur. Bəzən elə olurdu ki, çəkilişlər gecə vaxtı baş tuturdu. Amma onlar bütün bu və ya digər problemlərə rəğmən soyuğa, çətinliyə dözdülər. Çəkiliş boyu heç bir narazılığın şahidi olmadıq. Buna görə də heyətə və aktyorlara bir daha öz təşəkkürlərimi çatdırıram”.
Digər suallarımızı filmin əsas qəhrəmanlarından birinin obrazını canlandıran Nofəl Şahlaroğluya ünvanladıq. “4 Təkər”in onun aktyorluq karyerasında 36-cı film olduğunu söyləyən aktyor bizimlə söhbətində filmlə bağlı aşağıdakı məqamları dilə gətirdi: “Məni əsasən filmdəki dramaturji ardıcıllıq qane etdi. Çünki birinci səhnə ilə ikinci səhnənin çəkilişləri arasında on gün fərq var idi. Amma biz o ardıcıllığı saxlaya bildik. Əsas mən buna fikir verdim. “4 Təkər” mənim çəkildiyim 36-cı filmdir. Nə dərəcədə yaxşı, ya pis oynadığımı bilmirəm. Bir şeyi demək istəyirəm ki, mən burada qızıl ortanı saxlamağa çalışmışam… Filmin baş qəhrəmanını canlandıran Əlibəylə məqsədimiz həmişə vəziyyəti oynamaq olub. Dramaturji materiali düz oynamaq lazımdır. Çalışmışıq bizə verilən vəziyyəti elə oynayaq ki, qəhrəmanlarla əlaqə qırılmasın. Zatən bir qəhrəman çox eksantrik oynayır, biri bir az qızıl ortanı saxlayır. Deməyim odur ki, biz belə bir tandemi yarada bilmişik”.
N.Şahlaroğlu həmçinin bu filmi Azərbaycan kinosunda ssenaridə, rejissorluqda ümumiyyətlə kino portfoliosunda bir inkişaf kimi görürsənmi sualımıza cavab olaraq bildirdi ki, oynadığı 36 filmin 29-u məhz komediya janrında olub. Bu tipli komediyalar bir az yumşaq komediyalardır. Yəni bu filmdə qurşaqdan aşağı ifadələr yoxdur. Demirəm bu filmə baxandan sonra bir çığır açılacaq, amma fikrimcə bu tipli filmlər çəkilməlidir ki, hər hansı rəqabət yaransın, səhvlərimizi görə bilək, öyrənə bilək. İstər operator, istər aktyor, istər rejissor, istər ssenari müəllifləri, istər bəstəkar, istər qrim ustaları, yəni hamı öz səhvini düzəltməlidir. Deməli, “4 Təkər” daha yaxşı filmlərin çəkilməsinə təkan verə bilər.
Məlumat üçün onu da qeyd edək ki, filmin quruluşçu rejissoru və baş prodüseri Amil Əli, ssenari müəllifləri Məcid Hüseynov və Tərlan Nur Yaşar, görüntü rejissoru Şahmar Səfəroğlu, quruluşçu rəssamı Elnarə Səfəroğlu, montaj rejissoru Firdovsi A. Nəbiyev, bəstəkarı Behzad Məlikzadə, icraçı prodüserləri Fəqan Bayramov və Sərxan Mustafayev, səs rejissoru Toğrul Səfərovdur.
Filmin aktyor heyətində isə Məcid Hüseynov, Tərlan Nur Yaşar, Nofəl Şahlaroğlu, Əlibəy Məmmədli, Ramil Abdullayev, Ceyhun Məmmədov, Şəbnəm Əliyeva, Midhət Aydın, Rövşən Kərimduxt və bir çox digər tanınmış aktyorlar təmsil olunur.
Aynur Kazımova
