Azərbaycan Kinematoqrafçılar İttifaqı “AKİDocs – sənədli filmin inkişafı və pitçinq” beynəlxalq layihəsinə müraciətlərin qəbulunu açıq elan edir.
Təlimin dili ingilis dili olduğu üçün layihəni təqdim edən heyətdən ən azı bir nəfərin ingilis dilini bilməsi şərtdir. Qəbul və dərslər ingilis dilində baş tutacaq. Layihəyə müraciət üçün son qəbul günü 17 Aprel saat 00:00-dır. Pitçinqdə qalib olan layihələr və onların inkişafı etdirilməsi məqsədilə pul mükafatı ilə təltif ediləcəklər. Layihə 22-28 aprel tarixlərində baş tutacaq.
Sənədli film layihəsini müəyyən qədər inkişaf etdirmiş, əlində mövzunun araşdırma materialları olan kinematoqrafçılar üçün nəzərdə tutulan bir həftəlik layihə, inkişaf emalatxanasıdır. Layihə ərzində sinopsisin, loqlaynların inkişafı məqsədilə intensiv dərslər keçiriləcək və iştirakçıların ingilis dilində pitçinqə hazırlığı baş tutacaq. Layihəyə tamhüquqlu iştirakçılardan əlavə, 3 nəfər azad dinləyici də seçiləcək. Lakin onlar pitçində iştirak etməyəcəklər,
İştirak üçün aşağıdakı məlumatlar İNGİLİS DİLİNDƏ, 1 PDF faylında (faylın adı müraciətçinin öz adı ilə adlandırılmalıdır.) [email protected] email ünvanına “AKİDocs” başlığı ilə göndərilməlidir.
Lazımi məlumatlar:
İştirakçının adı, soyadı, əlaqə nömrəsi, elektron ünvanı.
Foto (Rejissor. Əgər prodüser varsa, onun da fotosu)
Layihə barədə yarım A4 səhifəlik sinopsis və 2 cümlədən çox olmayan loqlayn.
Niyyət məktubu: müəllif niyə bu filmi çəkmək istəyir və bizim layihədə iştirak niyə onun üçün maraqlıdır. (Cavab yarım səhifədən çox olmamalıdır)
Filmin hansı mərhələdə olduğu haqda məlumat. (İndiyə qədər hansı çəkilişləri edib. Əlində nə qədər araşdırma, istehsal materialları və s. var)
Rejissorun (əgər varsa, prodüser də o cümlədən) sənədli film portfoliosu. Bundan əvvəl hansı filmləri olub, varsa o filmlərin treylerlərinin və ya filmin linki. Əvvəllər Azərbaycanda və xaricdə sənədli film üzrə iştirak etdiyi layihələr.)
Layihədə iştirak edən heyətin siyahısı (rejissor qismində tək iştirak edəcək yoxsa prodüserlə birlikdə).
Filmin tizeri (ingilis dilində subtitrin olması şərtdir. Əgər tizer yoxdursa, müəllifin filmi təqdim edə biləcəyi vizual videomaterial. 5 dəqiqədən çox olmamaq şərtilə)
Layihədə iştirak edəcək rejissor (və ya prodüserin) ingilis dili səviyyəsi haqda məlumat . (Strong beginner, Pre-intermediate, Intermediate və s.)
Rəqabətin çox olduğu beynəlxalq layihələrə gənc azərbaycanlı müəlliflərin seçilmək şansını artırmaq, layihənin əsas məqsədidir. Bunun üçün filmin sinopsisi, loqlaynı cəzbedici, qaydalara uyğun yazılması mühüm əhəmiyyət kəsb edir. Bu layihənin nəticəsində inkişaf etdirilmiş loqlayn və sinopsisləri olan iştirakçılar beynəlxalq pitçinq təcrübəsi ilə bağlı dərslər aldıqdan sonra juri önündə pitçinqdə iştirak edərək pul mükafatı qazanmaq üçün yarışacaqlar.
Layihənin təlimçisi Tue Steen Müller, Danimarka Kino Şurasında 20 ildən çox qısa və sənədli filmlər üzrə çalışıb. O, milli və beynəlxalq qəzet və jurnallar üçün məqalələr yazıb, Baltik Film və Televiziya Festivalı, Filmkontakt Nord, Aİ və Avropa Sənədli Şəbəkəsinin Sənədli filminin həmtəsisçisi olub. Tue 40-dan çox ölkədə sənədli kurslar və seminarlar verib. Bu il onun sənədli film yaradıcılığının 50 ili tamam olur. 2007-ci ilin sentyabrından İtaliyada, Zeliq Sənədli Filmlər Məktəbində müəllim kimi çalışan Tue Steen, Avropa sənədli kinosunda, xüsusilə layihələrin inkişafı üzrə çox mötəbər mütəxəssisdir.
Əlavə suallar üçün [email protected] ünvanına müraciət edə bilərsiniz.