5–8 avqust 2025-ci il tarixlərində Qazaxıstanın Aktau şəhərində “Aktau – Türk dünyasının mədəniyyət paytaxtı” proqramı çərçivəsində URKER Beynəlxalq Animasiya Film Festivalı keçirilib. Festivalın əsas məqsədi –qazax alim-mifoloq Serikbol Kondıbayın (1968–2004) zəngin irsini tanıtmaq və türk dünyası ölkələrinin animasiya sənətini bir araya gətirmək idi.
Festivalın əsas müsabiqə proqramında iştiraka edən Məsud Pənahinin “Narqız” filmi “TÜRKSOY xüsusi mükafatı”na layiq görülüb. Mükafatı Beynəlxalq Türk Mədəniyyəti Təşkilatının (TÜRKSOY) baş katibi Sultan Rayev “Narqız” filminin prodüseri, Azərbaycan Animasiya Assosiasiyasının sədri Rəşid Ağamalıyevə təqdim edib. Mükafat “Türk dünyasının mədəni irsinə və bədii ifadəsinə göstərilən görkəmli töhfəyə görə” təqdim olunub.
Festivalın münsiflər heyətində Özbəkistan rejissoru Mavzur Mahmudov, Azərbaycan Animasiya Assosiasiyasının üzvü, Türk Animasiya Assosiasiyanın (ATA) sədri, “Plastilin” (Finlandiya) və “Alove” (Azərbaycan) studiyaların direktoru, prodüser Oqtay Yusibov, Türkiyənin “Rafadan Tayfa” serialının rejissoru və prodüseri İsmail Fidan, Qazaxıstan sosial antropoloqu Evfrat B. İmambek və Qırğızıstan rejissoru Kanybek Omurbekov təmsil olunublar.
Festivalın müsabiqədənkənar proqramında həmçinin rejissor Nəzrin Ağamalıyevanın “Hədis” animasiya filmi tamaşaçılara təqdim edilib.
Festivalın təşkilatçıları Qazaxıstan Respublikası Mədəniyyət və İnformasiya Nazirliyi və Manqistau vilayəti Akimatı idi. “Yeni türk zamanının animasiyası” şüarı altında keçirilən URKER festivalının gələcəkdə türk dünyası animasiya mühitində mühüm körpü rolunu oynayacağı gözlənilir.
