“Bütün bəşəriyyət sevgisizlikdən əziyyət çəkir və bütün baş verən anlaşılmazlıqlar, xaoslar, cinayətlər, nə pis vərdişlər var, bunların hamısının kökü sevgisizlikdir”.
Bu ilin əvvəlində kinoteatrlarda göstərilən “Apatiya” filminin davamı çəkilir. Çəkilişləri 14 gün davam edəcək olan tammetrajlı bədii filmin çəkilişinin üçüncü günündə aktyor/rejissor Hikmət Rəhimov bildirdi ki, sevgisizlik mövzusu onu narahat edir: “Bütün bəşəriyyət sevgisizlikdən əziyyət çəkir və bütün baş verən anlaşılmazlıqlar, xaoslar, cinayətlər, nə pis vərdişlər var, bunların hamısının kökü sevgisizlikdir”.
Rejissor həmçinin qeyd etdi ki, bu filmdə dramaturji xətt olaraq yeniliklər var. Film atasının cinayətinə şahid olmuş uşağın və Akifin 10 il sonrakı həyatlarından bəhs edir. Təqdimatı 2025-ci ilin yanvar ayına planlanan filmin rejissoru, ssenari müəllifi və baş prodüseri Hikmət Rəhimovdur. O, həmçinin filmdə aktyor kimi iştirak edir.
– “Apatiya” filminə müsbət və mənfi rəylər oldu. Bu filmdə tənqidi rəyləri nəzərə almısınız?
- Tərifdir, tənqiddir bunların hamısı normal bir şeydir. Əsas odur ki, ortada bir iş olsun və onun müzakirəsi baş tutsun. Çünki oturub fikirləşsək ki, ancaq bizə baxsınlar, bizi tərifləsinlər, bu normal bir şey deyil.
- Sizcə müasir tamaşaçımız sərt problemləri qoyan filmlərə baxmağa hazırdırmı?
- Bu zövq məsələsidir. Bəzi insanlar bayağı filmlərə baxıb zövq alır, bəziləri art-müəllif işlərinə baxırlar və daha sərt hekayələr də görmək istəyirlər.
Son olaraq isə rejissor bildirdi ki, ““Apatiya” kiçik bir məkanda çəkildiyi üçün 5-6 nəfər aktyor görürdük, amma burada 30-a yaxın aktyor var. Onlardan bəzilərini tamaşaçılar ilk dəfə görəcək və mən özüm də onların debut işini səbirsizliklə gözləyirəm”.
Filmin yaradıcı heyəti
Baş prodüser: Hikmət Rəhimov
Rejissor: Hikmət Rəhimov
Ssenari müəllifləri: Hikmət Rəhimov, Elvin Paşa
Operator: İman İmanov
Rəssam: Zaur Abdullayev
Rollarda: Azər Aydəmir, Rasim Cəfər, Zülfiyyə Qurbanova, Vaqif Kərimov, Nəsibə Eldarova, Flora Hüseynova, Hikmət Rəhimov, Murad Şükürlü
Filmin yaradıcı heyətinə uğur diləyirik!