Sənədli kino vasitəsilə uşaq dünyasına və ekoloji düşüncəyə səyahət
DokuToor 002 proqramı uşaqlar, yeniyetmələr və böyüklər üçün sənədli kinonun maarifləndirici və ilhamverici gücünü ön plana çıxarır. Layihə iştirakçılarda ətraf mühitə həssas münasibətin formalaşdırılmasını və dünyanı daha dərindən dərk etməyə təşviqi hədəfləyir. Proqram çərçivəsində seçilmiş yerli və beynəlxalq sənədli filmlər orijinal dildə, Azərbaycan və ingilis altyazıları ilə nümayiş olunur, eyni zamanda izləyicilərlə interaktiv müzakirələr təşkil edilir.
DokuToor 002 — “Sənədli kino: uşaq dünyası və ekoloji düşüncənin inkişafı naminə” proqramı növbəti dayanacağına yollanır. Bu dəfə layihə Xəzər Universiteti Sumqayıt Dünya Məktəbinin şagirdləri ilə görüşəcək.
Təşəbbüsün əsas məqsədi uşaqların daxili dünyasına toxunmaqla yanaşı, onlarda erkən yaşlardan ekoloji məsuliyyət hissini gücləndirməkdir. Sənədli kino vasitəsilə real hekayələr və həyatın müxtəlif qatları ilə tanış olan şagirdlər empati qurmağı, həmçinin ətraf mühitlə bağlı daha şüurlu qərarlar verməyi öyrənirlər.
Qeyd edək ki, “Sənədli kino — uşaq dünyası və ekoloji düşüncənin inkişafı naminə” — DokuToor 002 layihəsi DokuBaku Beynəlxalq Sənədli Film Festivalı, Gənc Film İstehsalçıları Assosiasiyası və Azərbaycan Kinematoqrafçılar İttifaqının birgə təşəbbüsü ilə həyata keçirilir və Azərbaycan Respublikası Mədəniyyət Nazirliyi tərəfindən dəstəklənir.
Proqram çərçivəsində nümayiş olunacaq filmlər
Xəzər Universiteti Sumqayıt Dünya Məktəbi – 23 aprel 14:00
HEÇ YERƏ MİQRASİYA Nikolay Flotskiy | 0:23:25 | Norveç
“Heç Yerə Miqrasiya” Norveç dilində səsləndirilən fəlsəfi şeirlə müşayiət olunan ağ-qara film-səyahətdir. Film miqrasiya və uyğunlaşma prosesindən keçən insanın daxili boşluq hissi ilə üzləşməsini poetik dillə təqdim edir. Daha geniş mənada isə texnoloji tərəqqi ilə insan inkişafı arasındakı uçurumun yaratdığı müasir dünyanın transformasiya böhranına toxunur. “Biz hara gedirik?” sualı film boyunca kinematoqrafik ifadə ilə səsləndirilir və izləyicini itirilmiş gələcək hissi ilə üz-üzə qoyur.
LİSSABON, DAXİLİ VƏHŞİLİK Madalena Boto | 0:50:24 | Portuqaliya
Lissabon son 3000 ildə dəyişərək inkişaf etsə də, şəhər daim sakinlərinin ehtiyaclarını ön planda saxlayıb. İlk baxışda vəhşi təbiət üçün uyğun mühit kimi görünməsə də, bir çox canlı növü burada yaşamaq və çoxalmaq üçün zəruri şəraiti tapır. Paytaxtın küçələrində, damlarında və bağlarında — Tagus River sahillərindən Monsanto Forest Park-a qədər — göz önündə olsa da, çox vaxt diqqətdən kənarda qalan təbiəti kəşf edirik.
Nümayişdən sonra tanınmış kino tənqidçisi Aygün Aslanlının moderatorluğu ilə sual-cavab sessiyası və açıq müzakirə keçiriləcək. Bu görüş filmlərin dərin qatlarını birlikdə kəşf etmək, müxtəlif baxışları bölüşmək və kino ətrafında canlı, səmimi dialoq qurmaq üçün nadir imkan yaradır.
Sizi bu təsirli sənədli hekayələri birlikdə kəşf etməyə, düşünməyə və hiss etməyə dəvət edirik. Gəlin, sənədli kinonun sehrinə birlikdə qərq olaq — real həyat hekayələrinə daha yaxından baxaq və sənətin birləşdirici gücünü paylaşaq.
DokuToor layihəsi bölgələrdə və təhsil müəssisələrində sənədli kinonun yayılmasını davam etdirərək, yeni nəsildə həm estetik zövqün, həm də sosial və ekoloji məsuliyyətin formalaşmasına töhfə verir.
DİQQƏT! GİRİŞ SƏRBƏSTDİR!
