SƏDAQƏT KƏRİMOVA: “SELLƏRƏ, YAĞMURLARA DÜŞSƏK DƏ KƏNDİN AB-HAVASINI, RUHUNU FİLMLƏŞDİRƏ BİLDİK”
MİR SAHİB QABİLOĞLU: ““HAL” DÜNYA KİNOSUNDA İSTİFADƏ EDİLƏN HEÇ BİR İSTİQAMƏTİ TƏKRARLAMIR”
Nizami Kino Mərkəzində rejissor Sədaqət Kərimovanın “Hal” bədii filminin təqdimatı keçirilib. Psixoloji dram və mistika janrında çəkilən film ailə-məişət zorakılığından bəhs edir. Ekran işinin ssenari müəllifi də Sədaqət Kərimovadır. Film müəllifin 1992-ci ildə yazdığı eyni adlı əsərinin motivləri əsasında ekranlaşdırılıb.
Ekran əsəri Park Cinema Kinoteatrlar şəbəkəsi və Nizami Kino Mərkəzində nümayiş olunur. Xronometrajı 1 saat 50 dəqiqə olan filmdə rolları Mir Sahib Qabiloğlu, İranə Kərimova, İlyas Əhməd, Kəbirə Həşimli və başqaları ifa ediblər. Həmçinin yaradıcı heyətdə quruluşçu operator Elxan Rüstəmov, quruluşçu rəssam Sevda Məmmədova, bəstəkar Sədaqət Kərimova, səs rejissoru Teymur Kərimov, montaj rejissorları Nicat Qayıbov, Sahib Ağayev, qrimçi Səadət Sadıqova, geyim rəssamı İradə Heydərova və başqaları yer alır.
Həm film, həm də ümumiyyətlə mövzu ilə bağlı təəssüratlarını oxucularımız və tamaşaçı auditoriyası ilə bölüşmək üçün Sədaqət Kərimovadan və filmin baş qəhrəmanlarından biri olan Mir Sahib Qabiloğlundan Kinoinfo.az internet portalının suallarını cavablandırmalarını xahiş etdik. Müəllif və rejissor S.Kərimova söhbətimiz zamanı bu ümummilli və ümumbəşəri ideyanın rüşeymlərini dilə gətirdi:
-Bu film mənəviyyata bir çağırışdır. Təsəvvür edin ki, hər gün, bəlkə də hər saatda ətrafımızdakı insanların yanından keçirik, amma onların ürəklərindən xəbərsiz oluruq. Mən bu filmimlə insanlara demək istəmişəm ki, bir-birinizin yanından elə belə, laqeydcəsinə keçməyin. Bacardığınız qədər onların qəlbinə boylanın. Görün orda nə faciələr yaşanır.
-Sədaqət xanım, filmin çəkilişləri, çəkiliş zamanı üzləşdiyiniz problemlərdən də danışmağınızı istərdik…
-Çəkilişlər bir ay boyunca davam etdi. Çəkilişlərimizi Quşar rayonunun İmamqulukənd kəndində reallaşdırdıq. İnanın ki, o günlərdə çəkiliş meydançalarımız sellərə, yağmurlara düşdü, çoxlu digər çətinliklər qarşısında qaldıq, amma qətiyyən kənddən çıxmadıq ki, kəndin o ab-havasını, kəndin o ruhunu daha yaxından və daha təbii şəkildə filmləşdirə bilək. Gecə-gündüz bu çəkilişlər apardıq. Ona görə bax elə “Kinoinfo.az” saytının yaratdığı bu imkandan da istifadə edib çəkiliş heyətinin bütün üzvlərinə dərin minnətdarlığımı bildirirəm.
Təqdimatda iştirak edən filmin baş qəhrəmanlarından birinin obrazını canlandıran Mir Sahib Qabiloğlu isə öz açıqlamasında aşağıdakıları söylədi:
-Bu film Sədaqət xanım tərəfindən mənə təklif olunanda, oynadığım obraz sırf xarakterimə uyğun olduğu üçün məni özünə çəkdi. Sonradan ssenarini oxuyanda müəllifə bir sıra təkliflər də verdim. Beləliklə, ssenaridə müəyyən əlavələr, dəyişikliklər etdik. Mənə görə filmin ən önəmli tərəfi onun milli xarakterdə olmasıdır. Əlbəttə o mənada ki, heç bir cərəyanı, dünya kinosunda indiyədək istifadə edilmiş heç bir istiqaməti təqlid etmir, təkrarlamır. Bu filmdə Sədaqət xanım ailə dəyərlərini önə çıxarır. Bu isə mənim daxilən konservativ olmasam belə, ənənələrə söykənən bir insan olduğum üçün marağımı xüsusilə cəlb edən məsələdir. Ona görə də böyük məmnuniyyətlə bu filmin işinə qoşuldun. Ekran işinin nə qədər uğurlu olub-olmadığını isə tamaşaçılar deyəcək. Bir kəlmə də deyim ki, ustadım, mərhum rejissorumuz Vaqif İbrahimoğlunun bir sözü var idi: ‘Uğursuz heç bir iş yoxdur, istənilən iş növbəti iş üçün təcrübədir! Bu da bizim üçün növbəti təcrübə idi. Ümidvaram ki, bundan da daha gözəl filmlər ərsəyə gələcək.
Aynur Kazımova
P.S. “Hal” filmi Sədaqət Kərimovanın rejissor kimi üçüncü, ssenari müəllifi kimi isə dördüncü ekran işidir. Onun ilk filmi rejissor Elşən Zeynallının quruluşunda çəkdiyi, artıq kino industriyasının diqqətini çəkən və geniş tamaşaçı auditoriyası toplayan “Soyuq Günəş” filmi olub.
