“Vətəndaş A” çoxseriyalı bədii filmindən sonra “Otel Loo” adlı tammetrajlı bədii filmini çəkən rejissor Elvin Rüstəmzadə öz komandası ilə birlikdə çəkilişləri başa çatdırmaq üzrədir.
2025-ci ilin fevral ayında nümayiş olunacaq “Otel Loo”nun baş prodüseri İslam Ağa, prodüseri Nurlan Qarayevdir. Ekran əsəri “3İ Cinema“ və “Gold Cine Vision” tərəfindən birgə istehsal olunur.
Xronometrajı 75 dəqiqə olan filmin mövzusuna əsasən tanınmış psixoloq Murad müxtəlif sosial verilişlərdə ekspert kimi çıxış edir. Bir gün onun qəbuluna Aliyə adlı məşhur müğənni gəlir. Müğənni psixoloqa onunla münasibətə başlamağı təklif edir. Astrologiyaya həddən artıq inanan Aliyə şəxsi həyatını da bürclərə uyğun qurmağa çalışır. O, eksperti televizorda görüb, bəyənib, hətta onun bürcü ilə də maraqlanıb və müəyyən edib ki, ona ən uyğun partnyor hansısa pasiyenti yox, elə Muradın özüdür. Beləliklə, Aliyə Muradı şirin dillə yoldan çıxarır və onlar ilk gecəni oteldə keçirməyi qərara alırlar. Murad ehtirasa qapılarkən şəhvət hissinin ona güc gəldiyi anlarda özündən biixtiyar Aliyənin boğazından yapışıb bərk-bərk sıxır. Nəticədə Aliyə həyəcandan huşunu itirir. Hərəkətsiz uzanıb qalmış Aliyənin ürəyinin vurmadığı hiss olunur. Murad Aliyənin öldüyünü zənn edib təlaşlanır. O, düşdüyü bu çətin vəziyyətdən çıxış variantları axtarır. Nəhayət, öz həyat yoldaşı, məhkəmə tibbi ekspertizasının kriminalisti işləyən Səbinəni köməyə çağırmağa məcbur olur…
Filmin yaradıcı heyətinin digər üzvlərinə gəldikdə, ekran işinin ikinci rejissoru Telman Talıb, quruluşçu operatoru Vasif Vəlizadə, bəstəkarı Vüqar Məmmədzadədir. Əsas rolları aktyorlar Azər Aydəmir, Oksana Rəsulova, Günəş Mehdizadə və Asiman Ağa Rövşən canlandırırlar. Quruluşçu rəssamı Ülviyyə Verdiyeva, səs rejissoru Emin Mahmudov, işıq rəssamı Məhəmməd Əhmədov, qrim rəssamı Samirə Mustafayeva olan filmdə digər rollarda aktyorlar Kamil Nazim, Nurlan Süleymanov, Ramil Məmmədov, Nihad Heybətov, Səmimi Fərhad və Mələk Hacıyeva çıxış edirlər.
Komediya janrında çəkilən filmin rejissoru Elvin Rüstəmzadə bizimlə söhbətində ekran işini belə dəyərləndirdi: “Biz bilirik ki, ölkəmizdə daha çox komediya janrı izlənir. Mən buna qətiyyən dırnaqarası baxmıram, ancaq komediya janrı izlənir deyə bu pis bir haldır. Bizdə “vəziyyət komediyası”dır. İnanıram ki, elə hadisənin özü maraqlıdır və insanlar izləyəcək bu komediyanı. Mən bu filmə inanıram”.
Filmin bütün kinoteatrlarda nümayişi nəzərdə tutulur.
