Quruluşçu rejissor Amil Alinin macəra-komediya janrında çəkdiyi “4 təkər” filmi 18 sentyabr tarixindən etibarən yenidən kinoteatrlarda nümayiş olunacaq. Xronometrajı 1 saat 40 dəqiqə olan filmdə hadisələr Xəqaninin sevdiyi qızın ailəsinə məxsus klassik avtomobili qumarda uduzması ilə başlayır. Bu avtomobilin Səlim üçün xüsusi dəyəri olduğundan, Nüşabə atasının Xəqanidən xoşlanmadığını bilsə də, maşını təmir etdirərək onu məhz Xəqaninin adı ilə atasına sürpriz etməyi planlaşdırır. Lakin Xəqaninin məsuliyyətsizliyi bu ümidi puç edir. Dostları isə avtomobili geri qaytarmaq üçün ona kömək etməyə çalışırlar. Ancaq bu yol asan olmur, çünki onların qarşısında qəddar və hiyləgər qumarxana sahibi Şahmar dayanır.
Filmin quruluşçu rejissoru və baş prodüseri Amil Ali, ssenari müəllifləri Məcid Hüseynov və Tərlan Nur Yaşar, təsvir rejissoru Şahmar Səfəroğlu, quruluşçu rəssamı Elnarə Səfərli, bəstəkarı Behzad Məlikzadə, montaj rejissoru Firdovsi A.Nəbiyev, səs rejissor Toğrul Səfərov, icraçı prodüserləri isə Fəqan Bayramov və Sərxan Mustafayevdir.
Aktyor heyətində Məcid Hüseynov, Tərlan Nur Yaşar, Nofəl Şahlaroğlu, Əlibəy Məmmədli, Ramil Abdullayev, Ceyhun Məmmədov, Şəbnəm Əliyeva, Midhət Aydın, Rövşən Kərimduxt və digər tanınmış aktyorlar rol alıblar.
Sentyabrın 19 sentyabrda Nizami Kino Mərkəzində “4 təkər” filminin nümayişi ilə birlikdə www.alioglumedia.az saytının da təqdimatı olacaq.