Gənc Film İstehsalçıları Assosiasiyasının təsis etdiyi kino-xəbər saytı – kinoinfo.az 2024-cü il yanvar ayının 10-dan etibarən aktiv fəaliyyət göstərir. Saytın “Qovluqda”, “Meydanda”, “Ekranda”, “TV-də”, “İri planda”, “Ümumi planda” və digər bölmələri ölkəmizdə kino istehsalının bütün mərhələlərində baş verən yeniliklər haqda oxucuları məlumatlandırır.
Keçən 7 ay əzrində saytda 200-ə yaxın xəbər və məqalə yayımlanıb. Bu yayımların əksəriyyəti eksklüziv xəbərlərdən, analitik araşdırmalardan ibarət olub. Azərbaycan Kinematoqrafçılar İttifaqı saytın əsas maliyyə donorlarından biridir.
Gənc Film İstehsalçıları Assosiasiyası ilə Azərbaycan Respublikasının Kino Agentliyi arasında bağlanmış müqaviləyə əsasən KİNOİNFO.AZ 1 il ərzində Agentlik tərəfindən maliyyələşəcək. Saytın əsas hədəflərindən biri iş adamlarını yerli kino istehsalı haqda məlumatlandırmaq və onları kinoya investisiya qoymağa sövq etməkdir. İş adamlarımız bir qayda olaraq kino kimi potensial gəlirli sahədə baş verən proseslərdən xəbərsiz olur. Bu məqsədlə saytın məqalələrində kinonun iqtisadi aspektinə, statistikaya, kinoya aid maliyyə xəbərlərinə geniş yer ayrılır. Məqsəd, region kinosunda baş verən prosesləri kino ictimaiyyətinə çatdırmaqdır.
Gənc Film İstehsalçıları Assosiasiyasının sədri Əli İsa Cabbarov sayta ayırdığı diqqətə görə Azərbaycan Respublikası Mədəniyyət Nazirliynə və Azərbaycan Respublikasının Kino Agentliyinin baş direktoru v.i.e. Orxan Fikrətoğluna təşəkkür edərək qeyd edib ki, qarşımızda duran əsas hədəflərdən biri kinomuzun beyin mərkəzlərindən biri olmaqdır. Belə ki, sayt monitorinq aparmaq, statistikanı izləməklə yanaşı durumun analitikasını da aparacaq. Kinoinfo.az kino sahəsinə marketoloji münasibətilə seçilən ilk kino xəbər saytıdır.
Saytın layihə rəhbəri Əli İsa Cabbarov, redaktoru Ramil Ələkbərovdur.