13–19 oktyabr 2025-ci il tarixlərində Bakıda baş tutacaq 9-cu DokuBaku Beynəlxalq Sənədli Film Festivalının hörmətli münsiflər heyətinin tərkibi açıqlanıb.
Bu il festival, tamaşaçıları cəsarətli və düşündürücü “5DHYPERDIVINEMAT3X” mövzusu ilə qarşılayacaq və sənədli kinematoqrafiyanın sərhədlərini yenidən müəyyənləşdirəcək.
Hər il DokuBaku sənədli kino sənətinə öz töhfəsini verən, yeni baxış bucaqları gətirən və qlobal kino mühitində söz sahibi olan yaradıcı şəxsləri münsif kürsüsündə bir araya gətirir. 2025-ci ildə isə festivalımız dünyanın müxtəlif ölkələrindən gələn görkəmli rejissorlar, prodüserlər, kuratorlar, festival rəhbərləri və tənqidçiləri bir araya gətirərək çoxsəsli və zəngin bir münsiflər heyəti təqdim edir. Onlar yalnız peşəkar bacarıqları ilə deyil, həm də sənədli kinonun gücü ilə həqiqəti araşdırmaq və paylaşmaq ehtirasları ilə seçilirlər.
Münsiflərin missiyası sadəcə qalibləri seçmək deyil. Onlar müxtəlif mədəniyyətlər, nəsillər və baxış bucaqlarını birləşdirərək dialoqlar yaradacaq, zamanımızı ifadə edən hekayələrin yeni təfsirlərinə işıq tutacaqlar. Onların qərarları sənədli filmlərin bədii-vizual mükəmməlliyini, cəsarətli hekayəçiliyini və kəşf ruhunu önə çıxaracaq.
Xatırladaq ki, builki DokuBaku festivalında münsiflər heyəti 6 müxtəlif kateqoriya üzrə 57 seçilmiş film arasından ən yaxşıları müəyyən edəcək.
2025-ci il DokuBaku münsifləri:
DOKUTAM – Ən Yaxşı Beynəlxalq Tammetrajlı Sənədli Film
Tue Steen Müller, Polina Herman, Cüzeppe Qariazzo
DOKUBOX – Ən Yaxşı Debüt Sənədli Film
Oktay Namazov, Dinorat Ramirez Qonzalez, Kamran Qasımov (AKİ-nin İdarə Heyətinin üzvü)
DOKUECHO – Təbiət Haqqında Ən Yaxşı Sənədli Film
Richard James Allen, Emin Əfəndiyev (AKİ üzvü), Ruslan Mollayev
DOKUKIDS – Uşaqlar üçün Ən Yaxşı Sənədli Film
Ruben Qomes, Aysel Əmirova, Nikolay Flotski
DOKUMUSE – Musiqi və Ritim Haqqında Ən Yaxşı Sənədli Film
Katerina Tarbo-Ignatenko, Cavad Tağızadə, Basilio Maritano Sailer
DOKUSHORTS – Ən Yaxşı Beynəlxalq Qısa Sənədli Film
Əli-Səttar Quliyev (AKİ üzvü), Leyli Salayeva, Kaz Mizushina
Bu nüfuzlu kino mütəxəssisləri müxtəlif mədəniyyətlərdən gələrək öz fərqli baxış bucaqları, peşəkar yanaşmaları və sənətə olan sevgiləri ilə builki festivalı daha da zənginləşdirəcəklər. Onların seçimləri nəticəsində müəyyən olunacaq qaliblər yalnız DokuBaku-nun deyil, ümumilikdə sənədli kino dünyasının yeni uğurlarına işıq tutacaq.
Hər bir münsifin yaratdığı unikal dəyər, dünya kinosuna verdiyi töhfələr və sənədli kino sevgisi haqqında daha ətraflı məlumat üçün bizi izləyin və dokubaku.az saytına nəzər salmağı unutmayın!
Qeyd edək ki, Azərbaycan Kinematoqrafçılar İttifaqı festivalın əsas partnyoru olaraq, hər il olduğu kimi, bu il də DOKUBAKU beynəlxalq festivalına dəstək verir. AKİ katibliyi yerli festivallara dəstəyi, kinomuzun inkişafı üçün vacib amil hesab edir.